Selaouit ar ganaouenn (e traoñ ar prenestr)
pe pellgargit anezhi
Tri martolod a zo ur ganaouenn da zañsal, un dañs-tro tri faz, a voe savet a-raok an naontekvet kantved, sur a-walc'h gant tud a vor eus Breizh-Uhel, e bro Naoned marteze, ha troet e brezhoneg goude-se. Ne gaver roud eus ar ganaouenn-se nemet e Kornôg Frañs ; ur stumm kebekat a zo ivez avat.
Meur a enrolladenn a gaver. Menegomp re an Namnediz, Stivell, ha, n'eus ket pell zo, hini ar strollad Manau (La Vallée de Dana), hag ivez hini Yann-Fañch Kemener ha Didier Squiban.
Evezhiadennoù yezh
Meur a stumm da ganañ an tri martolod-mañ a zo bet klevet ; lod anezho digomprenus a-walc'h.
Ifig Flatres en deus klasket ar stumm orin ha kinnig a ra amañ un istor gwirheñvel.
Sonstudi
Taolit evezh war framm an ton, div frazenn ennañ.
– An hini gentañ (A) a zo div lodenn 4 mentad enni, an eil o klozañ. Kanet e vez div wezh an hollad.
– An eil a zegas un eil tamm (B) pevar mentad ennañ, o chom en istribilh. Kanet e vez div wezh. Framm an ton a zo neuze : AA BB. Dre ma chom an tamm B en istribilh eo aes mont war-raok er ganaouenn ; met a-wezhioù e c'hell degas diaezamantoù evit dibunañ ar pozioù.
Pozioù
– 1 –
Tri martolod yaouank, tra la la la digatra
Tri martolod yaouank o vonet da veajiñ
O vonet da veajiñ ge, o vonet da veajiñ
– 2 –
Gant 'n avel bet kaset tra la la la digatra
Gant 'n avel bet kaset betek an Douar Nevez
Betek an douar nevez ge, betek an douar nevez
– 3 –
E-kichen mein ar veilh , tra la la la digatra
E-kichen mein ar veilh o deus mouilhet o ervioù
O deus mouilhet o ervioù, ge, o deus mouilhet o ervioù
– 4 –
Hag e-barzh ar veilh-se, tra la la la digatra
Hag e-barzh ar veilh-se e oa ur servijourez
E oa ur servijourez, ge, e oa ur servijourez
– 5 –
P'he deus-hi ma gwelet, tra la la la digatra
P'he deus-hi ma gwelet, he deus-hi ma goulennet
He deus hi ma goulennet, ge, he deus-hi ma goulennet
– 6 –
'Peus ket soñj den yaouank, tra la la la digatra
'Peus ket soñj den yaouank penaos memp graet konesañs
Penaos memp graet konesañs, ge, penaos memp graet konesañs
– 7 –
E Naoned er marc'had, tra la la la digatra
E Naoned er marc'had en ur choaziñ ur walenn
Echu eo ma chañsoñ, an hini oar a gontinu.
Sonskridoù
Pellgargañ ar sonskridoù e stumm PDF
Sonskrid 1
Ton ha pozioù :
Sonskrid 2
Ton eilmouezhiet :
Sonskrid 3
Ton eilmouezhiet en un doare all, diaesoc'h da lakaat e pleustr :
Kelenn
Lod eus ar vugale ne blij ket an tonioù kozh dezho ; fellout a ra dezho klevout tonioù diouzh ar c'hiz. Amañ avat e c'heller diskouez penaos e vez nevesaet un ton kozh ha roet dezhañ ur gwisk modern.
Live : kelc'hiadoù 2 ha 3.
Mod da renkañ ar c'hlas : klas a-bezh.
Lakaat e pleustr :
Evit kizidikaat ar vugale ouzh ar c'hanaouennoù hengounel, e c'heller kregiñ gant La Tribu de Dana (strollad Manau) ha degas tamm-ha-tamm ar stumm kozh.
El lodenn gentañ e vo dav diwall ouzh ar mod da lakaat ar vugale da dennañ o alan. Sellit mat ouzh ar merkoù a zo bet lakaet war ar skrid sonerezh. Aesoc'h e vo rannañ ar c'hlas dre zaou strollad.
Eil mouezh :
Div eil mouezh a gavoc'h en dielloù stag, unan o vezañ aesoc'h eget eben.
Dielloù
An dud
Kan : Ifig Flatrès (ganet e Pont-’n-Abad e 1967)
Akordeoñs : Samuel Le Féon (ganet e 1986 e Lannuon)
