A59. Disheol, skeud, e-skeud
Sevel a ra ur gudenn pa dremener eus yezhoù all d'ar brezhoneg, pa n'eus nemet ur ger, ombre e galleg, Schatten en alamanteg, evit envel daou dra disheñvel e brezhoneg. E galleg hon eus à l'ombre, craindre son ombre, en alamanteg im Schatten, der Mann ohne Schatten, hag e brezhoneg : en disheol, kaout aon rak e skeud, an Den hep skeud. Setu fazioù am eus pennaouet amañ hag ahont :
a) *Burzhud a skeud ha sklerijenn...
b) *An noz o treiñ en-dro din, hag aze er skeud, da zremm.
c) *Bras a-walc'h e oa ar porzh, leun a skeud, rak uhel oa an tiez tro-war-dro.
Disheol zo un anv hollek, un anv danvez evel dour pe pri, a c'heller enebiñ ouzh heol, ouzh gouloù-deiz, hag a verk un diouver a heol. Ouzh sklerijenn ez eo teñvalijenn a vo enebet, kentoc'h. Lavaret e vez : azezomp en disheol, n'eus tamm disheol ebet amañ, klask an disheol, etc.
Skeud zo un anv unan, a denn d'un dra a zo etre an heol hag an douar : skeud ar wezenn, tourioù an iliz-veur a 'n em astenne o daou skeud, etc. Mes ne c'heller ket *azezal er skeud, na *klask skeud da gaout distan ha ne c'heller ket ivez enebiñ skeud ha sklerijenn, na skeud hag heol.
An teir frazenn uheloc'h a c'hell bezañ reizhet evel-henn :
a') Burzhud a deñvalijenn ha sklerijenn...
b') An noz o treiñ en-dro din, hag aze en deñvalijenn, da zremm.
c') Bras a-walc'h e oa ar porzh, leun a zisheol, rak uhel...
E-skeud zo un araogenn a c'heller treiñ e galleg gant en parallèle, à l'occasion de...
E-skeud labourat e ti Jestin e oa aet pelloc'h gant e studi.
E-skeud mont da brenañ an dilhad-se ez in da welet Hélène.
Poell. Treiñ, en ur implij e-skeud : La semaine prochaine, je vais à Audierne et je profiterai de l'occasion pour tenter de rencontrer le maire.