A26. Treiñ ar verb galleg imaginer
Re alies e vez kavet frazennoù evel homañ : *Arabat deoc'h ijinañ eo YA ! ur mekanik bras a 'z aio en-dro..., gant ur fazi geriadur a laka da droiñ imaginer gant ijinañ. En gwirionez ez eus meur a zoare da dreiñ ar galleg imaginer :
1) Imaginer a c'hell bezañ skeudenniñ en e spered. Troet e vo gant empentiñ, empennañ, gwelet (deus amañ) :
Gwelet a ran deus amañ an itronezed kran a glaske tapout ar vrec'h-saout o c'horo ur vuoc'h klañv !
Impentet am boa ur c'hozh strakell, mes homañ zo un oto a-feson !
2) Imaginer que a vo troet gant soñjal, hunvreal, hag, a-droc'h alies, ar ger lakaomp :
Soñjet em boa e c'hellfemp en em gavout e Kastellin.
Ma 'n em welfemp er sizhun a-zeu, lakaomp, neuze e c'hellfemp...
3) Imaginer = inventer. Aze, ya, e c'heller implijout ijinañ (un tu d'ober un dra bennak, ur mekanik, ur c'hoari, un diskoulm...), ha c'hoazh, evit un istor, ur goñchenn, e vo implijet kentoc'h sevel pe faltaziañ.
4) S'imaginer, hag a dal kement ha krediñ traoù faos. Troet e vo gant soñjal da..., krediñ da...
An dud deuet pinvidik en un taol a soñj dezhe int gwelloc'h a-gaozenn d'o arc'hant.
Te 'soñj dit e vo graet al labour e-unan, ha te en da wele ?
Ar vamm-gozh a grede dezhi he dije heritet deus he c'heniterv hep kaout netra da baeañ.
E galleg e vez klevet ivez estlammadennoù evel Tu t'imagines ! Imagine-toi ! etc. Anat eo n'eus ket tamm ijin ebet amañ, ha klevet e vo e brezhoneg : soñj 'ta ! soñj un tammig !
*Evel ma c'hellit ijinañ, am eus lennet n'eus ket keit-all, zo euzhus.
Berr-ha-berr : n'eo nemet ral a wech e vez implijet ar verb ijinañ ; soñjal a vez klevet kalz stankoc'h, hag evit ar frazenn gentañ, e vije bet kalz brezhonekoc'h lavaret : Arabat deoc'h soñjal eo YA ! ur mekanik bras...