A23. Diaes kompren, diaes da gompren (2)

Distreiñ d'al listenn

Setu amañ div frazenn heñvelster :
a) Kompren skridoù Russel zo diaes.
b) Diaes eo kompren skridoù Russel.
E c'heller keñveriañ an div frazenn-se gant div frazenn all :
c) An ti zo bras, ha : d) Bras eo an ti.
Er peder frazenn-se e kaver ur rener : kompren skridoù Russel, e a) ha b), , e c) ha d), hag un doareenn : diaes, e a) ha b), ha bras e c) ha d), liammet gant ur gopulenn : zo pe eo.
N'eus da ebet er frazennoù-se. Ar memes tra a c'hoarvezfe gant un nac'hadenn :
N'eo ket aes kompren skridoù Russel = Kompren skridoù Russel n'eo ket aes.

Ar pezh a c'heller remerkañ er frazenn a) eo e kaver gerioù a zo stank er gaoz pemdez (kompren, diaes, hep kontañ ar gopulenn) hag ur bomm a c'heller lâret eo an hini pouezusañ er frazenn, pa 'z eo renadenn ar ger kompren : skridoù Russel.
Pezh zo, eo techet ar brezhoneg da lakaat war wel al lodenn bouezusañ, setu e kaver ar frazenn e) heñvel he ster ouzh a) ha b) :
e) Skridoù Russel zo diaes da gompren.
Ar wech-mañ eo skridoù Russel ar rener, diaes an doareenn. Kompren zo un astenn-doareañ d'an anv-gwan diaes, ha degaset e vez an astenn-doareañ gant un araogenn ; evit ar ger diaes eo da.
Er memes mod e c'heller treuzfurmiñ ha dielfennañ an holl frazennoù kinniget ar sizhun paseet :
Souezhus (doareenn) eo gwelet ur c'hangourou e Rosko (rener).
Gwelet ur c'hangourou e Rosko (rener) zo souezhus (doareenn).
Ur c'hangourou e Rosko (rener) zo souezhus (doareenn) da welet (astenn-doareañ an anv-gwan souezhus).

Marteze oc'h nec'het peogwir em eus komzet eus Russel er penn kentañ. Mes ken gwir all e vo ar frazennoù ma lakit Hegel pe Lacan pe Koulizh Kedez, etc. Da choaz 'zo !