A19. Darev ha prest
Lennet am eus bet alies frazennoù evel homañ :
*Pa voe darev, e kemeras e wetur, gant an implij eus darev e-lec'h prest, marteze gant aon da skrivañ ur ger amprestet — er Grennamzer — digant ar galleg, ar pezh am boa kavet fentus ha diaviz war un dro.
Ar ger darev (= mûr), kar da zaou c'her all, darbet ha darvoud, a vez implijet e Nord ul linenn Landernev-Korle evit an eost, ar frouezh, tra ma vez implijet ar ger azv pe gerioù deveret er Su. Daou ster all en deus c'hoazh : un tamm e pep lec'h, e sinifi ivez tommet mat, kras, abaf, leun (evit an dud), da lâret eo mezv tamm pe damm ; e-se eo dizaliet kemer e wetur ur wech ma ver darev. War aodoù Bro-Gwened e tal kement ha poazh, evit ar boued.
Setu ne c'heller ket implijout ur ger all estreget prest er frazennoù-mañ :
Prest eo merenn, tudoù !
Prest eo da sac'h ganit ?
Prest out, Aline ?
Ha ma botoù, n'int ket prest c'hoazh ?
An dro-lavar darev da a vez klevet alies ivez, mes gant ur ster disheñvel diouzh hini prest da : darev da a sinifi emaer en hent mad d'ober un dra bennak, eo boulc'het an ober tamm pe damm (= en bonne voie pour, parti pour, sur le point de...) :
Hemañ zo darev da chom da ruzañ e-pad an deiz ! (evel ma eo partiet, ne ray nemet ruzañ !)
Darev eo da vanne kafe da glouaraat. (emañ o klouaraat tamm ha tamm.)
Darev eo da vont kuit, rak klevet 'm eus trouz e wetur. (Gant prest eo da vont kuit, e c'heller soñjal en deus prientet ar peadra evit mont kuit : kempennet eo, gwisket eo, prest eo e sac'h-beaj, etc., ha bremañ e rank gortoz un taksi.)
Un dra ziwezhañ : du-mañ 'm eus bet klevet hini pe hini deus ma zud o lâret, goude bezañ taolet ur sell war un tamm kig pe ur gwign a oa oc'h echuiñ poazhañ er forn : Hemañ zo darev da vezañ prest, d.l.eo e vanke dezhañ ur pennadig bihan hepken a-raok bezañ prest.
Da welet ivez : ALBB, P. le Roux, kartennoù 112 (mûr) ha 529 (cuit).