A5. A, eus, ouzh, diouzh, deus

Distreiñ d'al listenn

Un tamm mat a fazioù a vez graet bremañ en ur implijout eus, ouzh, diouzh. Dre vras e c'heller lakaat ar stummoù a gemeront e lec'h-mañ-lec'h da glotañ an eil re gant ar re all en ur heuliañ an daolenn-mañ :

Stummoù all a vez klevet ivez : dac'h, douz, oc'h, dioc'h, etc.

Fazioù a vez graet ar peurliesañ gant tud (Tregeriz pe Kerneviz) hag a glev deus e kement degouezh a zo hag a glask implijout ar stummoù klasel memestra :
a) *An trede abadenn a vo kaset da benn gant ar gompagnunezh Arvest, a ziskouezo pegen tost e c'heller bezañ eus e varc'h hag ar pezh a c'heller lakaat anezhañ d'ober.
b) *A bouez bras eo gouzout lenn an hunvreoù. Sur on ouzhin.
c) *N'eo dispartiet burev ar gelennerien sport ouzh gwisklec'h ar merc'hed nemet gant un tamm speurenn danav.

Dav eo o difaziañ evel-henn : tost ouzh e varc'h, sur on ac'hanon, dispartiet... diouzh..., ma heulier ar brezhoneg klasel, ha tost deus e varc'h, sur on deus ouzhin/deus oudon, etc., dispartiet... deus... ma heulier brezhoneg Kerne, lakaomp. An dud a implij deus a gustum displegañ anezhañ gant un eilaraogenn, ouzh ar peurliesañ : lavaret e vez deus ouzhin evel ma vez lavaret betek ennon, a-enep din, etc. Tud zo a denn deus hag a lez ouzhin hepken, pezh a zegas ur fazi alies. Rak gwelloc'h eo lavaret pellaat deus outo, ha pa n'eo ket bet degemeret ar stumm-se e brezhoneg skrivet e-pad bloavezhioù ha bloavezhioù, eget lavaret *pellaat outo, a zo ur fazi e-keñver ster ar verb pellaat hag an araogenn ouzh.

Lenn ivez : F. Kervella, Yezhadur bras, § 626-627