• Gant Julia Guyomard
• Tennet eus Ar Brezel bras + Gwelet an holl enrolladennoù tennet eus Ar Brezel bras
Gwerz bet dastumet gant Gildas Moal ha Marie-Françoise Harscoat digant Julia Guyomard e Perwenan e miz Kerzu 1978.
⇧ Selaouit an enrolladenn (e krec'h ar bajenn) ⇧ pe pellgargit anezhi
TESTENN :
E-barzh ar bloavezh mil nav c'hant pevarzek
Ur brezel spontus zo bet deklaret
E-barzh ar miz Eost, an devezh kentañ
Ni a meump klevet ar c'hleier o vrallañ
Ar c'hleier a vurmur gant ur vouezh trist ha moan
Deklaret zo brezel, ret vo mont d'an tan
Kalz a dud yaouank a devoa prometet
Vijent dimezet er bloavezh pevarzek
Goule koñje o zud pe o c’houzantamant
Da vezañ uniset deus taol ar sakramant
Mes pa deus klevet oa deklaret brezel
Ar bromese oa graet zo aet gant an avel
Ha pa deus klevet lenn an afichoù
Steniañ war o bisaj raktal liv ar maro
Gwelet vije ret dezhe dont da abandoniñ
O menaj, o loened hag holl dud o zi
D'o gwragez d'o bugale lâret kenavo
Ha mont d'ar brezel betek risk ar maro
Mes ret e oa mont da difenn drapeau ar republik
Ar brusianed oa arruet benn Beljik
Ar roue Guillaume en deus goulennet
Digant ar roue belj hag-eñ e vije lezet
Da dreuziñ ar Beljik ha donet da Frañs
Evit ma c’hallje primoc'h en em avañs
Met ar roue belj en deus refuset
Kerkent ar c’hanonoù a zo bet klevet
Neuze evit klevet trouz ar c’hanonoù
Kalz tud deus Bretagne en deus goulet ar maro
Gwragez Breizh Izel, merc’hed a gouraj
Bet peus kalz a boan terc’hel ho menaj
Bet ho peus poan gorf, bet peus poan spered
O terc’hel menaj gant domestiked
Ha pije muioc’h ezhomm deus ur mevel bras
Partiet eo da roula ne roe ken a gas
Eneb d’e oberoù ne oa mann da damal
Parti a raje kuit, diaes oa kaout un all
Gwragez Breizh Izel, merc’hed truezus
Evit ho mibien vefet karantezus
Ma vije plijet gant Doue reiñ deoc'h diveskell
Ho pije nijet betek Breizh Izel
Ho pije nijet war zu ho pro
Da lâret evite un toullad pedennoù
A-raok o c'huitaat ha dont war o giz
Da lâret kenavo hag un De Profondis