Kentelioù yezhadur Yann Gerven

A2. A-benn : disoc'h ha neket pal

Distreiñ d'al listenn

Komañs a rin gant div frazenn c'halleg (ken reizh an eil hag eben !) :
a) Qu'avez-vous fait hier pour que vous soyez si fatigués ?
b) Essayez de faire des efforts pour que vous soyez plus compétents demain !
Meur a c'halleger a wel en div frazenn ar memes framm pour que + subjonctif, hag ar framm-se, pour que + subjonctif, a zegas ur renadenn a laka ur pal war-wel. Padal e vez santet mad gant ar vrezhonegerien an diforc'h etre ar frazenn a), lec'h ma kaver un disoc'h : « vous êtes fatigués », hag ar frazenn b), lec'h ma kaver ur pal : « être plus compétent demain ».
Ar frazenn a) zo da vezañ troet : Petra 'poa graet dec'h A-BENN/EVIT bezañ ken skuizh-se ?
Ar frazenn b) : Klaskit ober bec'h EVIT bezañ barrekoc'h warc'hoazh.
A-BENN ne c'hell bezañ implijet nemet pa vez gwelet, remerket, klevet... disoc'h ar pal (mes ken alies all e vez implijet EVIT ivez). Pa vez just ur pal, na ouzer ket hag-eñ eo deuet pe e teuio da wir, e ranker lakaat EVIT.

Ar fazi a vez graet bremañ, ha mui-oc'h-mui, eo lakaat A-BENN evit degas ur pal, ha setu frazennoù sius am eus pennaouet amañ hag ahont :
*c) Gant m'en em skuizhin un tamm a-benn skarzhañ diouzh ma spered tout ar mennozhioù fall a zo o rodal ennañ.
*d) Met dreist-holl en deus maget un tamm fiziañs ennañ e-unan moarvat, a gemero harp warni a-benn sevel daou gaier e zornskrid, 530 pajenn enno, bet echuet e 1905.
*e) E seizh gwellañ a ra ar paotrig a-benn bezañ degemeret gant e gamaraded, en aner.
E c) ha d) emañ ar verboù skuizhañ ha kemeret harp en amzer da zont, setu ne weler ket c'hoazh disoc'h an ober. E e) eo an adverb en aner a ziskouez splann n'eus disoc'h a-feson ebet evit ar paotrig.

Setu bremañ skwerioù all eus implij reizh A-BENN am eus bet klevet :
f) Pell e oa bet é plego ha displego a-benn dont er-maez deus ar park. (Deuet e oa er-maez !)
g) Aet e oan pemp pe c'hwec'h gwech betek e di a-benn gwelet anezhañ (Ha gwelet 'm boa anezhañ !). E c'heller lâret ivez : aet e oan pemp pe c'hwec'h gwech betek e di evit gwelet anezhañ, mes neuze n'eur ket sur deus an disoc'h.